Q: Imam Hasan (A.S.) Ne Jo Izdiwaj Ja'dah Bint Ash'ath Se Kiya, Us Ki Kya Hikmat Thi?
A:
Jawab: Chunke Ash'ath Ka Khandan Ahlul Bayt Athar (A.S.) Se Shadeed Dushmani Rakhta Tha, Lihaza Kufa Mein Ameer-ul-Momineen (A.S.) Ki Hukoomat Ke Dauran Yeh Shadi Is Dushmani Ko Kam Karne Ka Sabab Banti. Isi Maslahat Ki Khatir Imam Hasan (A.S.) Ki Us Ki Beti Se Shadi Kara Di Gayi. Is Tarah Ki Maslahat Ke Tehat Us Daur Mein Badshahon Aur Qabaaili Sardaron Ke Darmiyan Shadi Ek Aam Riwayat Hua Karti Thi. Mazeed Jab Diqqat Ki Jaye To Hum Dekhte Hain Ke Ash'ath Ka Qabeela Ek Bara Qabeela Tha Aur Woh Apne Qabeelay Mein Ek Buzurg Mana Jata Tha. Chunke Musalman Jang Mein Apne Qabeelay Ke Sardaron Ke Matahat Hote The, Is Lihaz Se Ash'ath Ke Qabeelay Ki Himayat Hasil Karne Ke Liye Yeh Shadi Bohat Aham Thi. Pas In Tamam Baton Ko Dekhte Hue Is Shadi Ki Maslahat Wazeh Ho Jati Hai.
Q: Imam Hasan (A.S.) Apne Nana Rasool Allah ﷺ Ke Jawar Mein Dafn Hona Kyun Chahte The?
A: Rasool Allah ﷺ Se Apne Aap Ko Mansoob Karna Har Ek Ke Liye Sharaf Ka Ba'is Hai, Chahe Woh Aap ﷺ Ke Jawar Mein Rehna Hi Kyun Na Ho. Pas Imam Hasan (A.S.) Is Sharaf Ke Sab Se Zyada Haqdar The Kyun Ke Aap (A.S.) Ka Nasab Bhi Rasool Allah ﷺ Se Milta Hai Aur Aap (A.S.) Ilm-e-Nabuwwat Ke Malik Bhi Hain Aur Rasool Allah ﷺ Ke Khalifa Bhi. Pas In Wajuhat Ki Bina Par Aap (A.S.) Ka Jawar-e-Rasool Mein Rehna Aap (A.S.) Ka Sab Se Zyada Haqq Tha, Lekin Aap (A.S.) Ki Is Khwahish Ko Is Ummat Ke Ghasibon Ne Poora Nahin Hone Diya, Aur Shaykhain Jo Is Baat Ka Asal Mein Haqq Nahin Rakhte The, Apni Taqat Ke Zor Par Is Nisbat Ko Hasil Kiya Taake Jo Izzat Woh Kho Chuke The Woh Pa Saken.
Q: Imam Hasan (A.S.) Ne Apni Shahadat Ke Silsilay Mein Imam Hussain (A.S.) Se Waqt-e-aakhir Kya Baat Ki?
A: Kitab Irshad Safha 174 Par Mukhariqi Se Naql Hai Ke Jab Imam Hasan (A.S.) Is Duniya Se Rukhsat Hone Wale The To Aap (A.S.) Ne Imam Hussain (A.S.) Ko Apne Paas Bulaya Aur Kaha:
"Ae Mere Bhai! Main Tum Se Juda Aur Apne Rab Se Milhaq Hone Wala Hoon. Beshak Mujhe Zehar Pilaya Gaya Aur Qay Ke Sabab Mere Jigar Ke Tukray Tasht Mein Aa Gaye Hain. Mujhe Maloom Hai Ke Yeh Zehar Mujhe Kis Ne Pilaya Hai Aur Kis Ne Ise Diya Hai. Main Allah Ke Huzoor Us Se Mukhasama Karunga. Pas Mera Haqq Jo Tum Par Hai, Us Ki Wajah Se Main Ne Tumhein Yeh Baat Batai. Ab Main Intezar Karunga Ke Allah Mere Bare Mein Kya Faisla Karta Hai..."
